Shkolla “Rilindja” në Xhafzotaj me ambiente të reja sportive

TIRANË – Kanë përfunduar punimet në shkollën 9-vjeçare “Rilindja” në njësinë administrative Xhafzotaj, të bashkisë Shijak. Punimet e kryera në kuadër të Programit për Zhvillim Rajonal Shqipëri – Faza III, kanë pasur si objektiv kryesor ndërtimin e një fushe multisportesh në ambientet e jashtme të kësaj shkolle. Sipërfaqja e investimit është 900 metër katror ndërsa vlera e financimit 57,583.5 Euro. Nga ky projekt parashikohet të përfitojnë rreth 19 mijë banorë.

 

 
Nëpërmjet kësaj ndërhyrjeje janë përmirësuar kushtet në të cilat zhvillohet lënda e edukimit fizik për 200 nxënësit e shkollës “Rilindja”. Gjithashtu referuar Strategjisë Kombëtare “Shkolla Qendër Komunitare” dhe planit të veprimit të Bashkisë Shijak, ambientet sportive të shkollës, jashtë orarit mësimor do të jenë të hapura për komunitetin. Për më tepër që nga ky investim, përveç fushës sportive në ambientet e jashtme, në këtë shkolle janë krijuar edhe hapësira të gjelbra dhe rekreative (janë vendosur stola, mbjellë pemë, ndriçuar ambienti rekreativ), në ambientet e sportit është ndërtuar një shkallare për shikuesit, është vendosur ndriçim në fushë dhe është rrethuar në total sipërfaqja prej 900 metrash katrorë dhe fusha prej 500 metrash katrorë.